Каранік: БелАЭС дасць магчымасць рэгіёну развіваць новыя напрамкі інвестыцыйнай дзейнасці

Беларуская АЭС з’яўляецца прадметам гордасці краіны, адзначыў старшыня Гродзенскага аблвыканкама Уладзімір Каранік, які сёння прыняў удзел у прадстаўленні калектыву атамнай станцыі новага генеральнага дырэктара Сяргея Бабовіча.

"Праведзена каласальная работа. БелАЭС - гэта ўнікальны аб’ект, якім ганарыцца не толькі Гродзенская вобласць, але і ўся Рэспубліка Беларусь", - падкрэсліў Уладзімір Каранік.

Губернатар таксама адзначыў, што на станцыі сфарміраваны высокакваліфікаваны калектыў. "Гэта каманда аднадумцаў, сустракаючыся з якімі, я бачу людзей са ззяючымі вачамі, поўнымі энтузіязму. Гэта значыць, што станцыя і далей будзе развівацца", - сказаў ён.

Як дадаў Уладзімір Каранік, праект БелАЭС заклаў фундамент для далейшага развіцця рэгіёна: будаўніцтва сучасных прадпрыемстваў, развіцця новых напрамкаў інвестыцыйнай дзейнасці. "Да нас пацягнуліся інвестары з прапановамі, аб якіх мы раней не задумваліся, паколькі гэта вельмі энергаёмістыя вытворчасці і праекты. І я спадзяюся, што перыяд азнаямлення і папярэдніх перагавораў вельмі хутка пяройдзе ў практычную плоскасць. На першым этапе многія прыглядваліся - як будзе працаваць новы аб’ект. На сённяшні дзень ні ў інвестараў, ні ў рэальнага сектара эканомікі няма ніякіх сумненняў у надзейнасці, стабільнасці і перспектывах работы БелАЭС", - заявіў губернатар.

Шмат добрых слоў ад губернатара Гродзенскай вобласці і ад міністра энергетыкі прагучала ў адрас раней займаўшага пасаду кіраўніка атамнай станцыі Міхаіла Філімонава. Віктар Каранкевіч падзякаваў яму за шматгадовую добрасумленную працу і значны асабісты ўклад у развіццё атамнай энергетыкі ў Беларусі.